Bilboko Udaleko Webgunea

Bilbon, 2012ko maiatzaren 16an.- Erriberako Merkatuak, Bilboko Udalaren eta Eusko Jaurlaritzaren laguntzaz, abian jarri du produktuak online saltzeko plataforma bat: www.mercadodelaribera.net. Zehatzago, merkatarien elkarteko 16 dendak 274 produktu eskaintzen dituzte: arrainak eta itsaskiak, okela, urdaitegikoak, frutak eta barazkiak, txanpiñoiak, ozpinetan onduak eta kontserbak, hegaztiak eta arrautzak.
 

Orriaren konfigurazioa bat dator merkatuaren beraren konfigurazioarekin; hau da, saltokien arabera dago antolatuta, saltokiak era berean Erriberako jarduera jakin batean sailkatuta daudela. Merkatarien elkarteko kideak diren saltoki guztientzat dago zabalik, hauek nahi izanez gero, etorkizunean ekimenean sartzeko.
 

Erosketa egunean prozesatzen da. Eskariak 11:30ak baino lehen egin behar dira, bestela, ordu horretatik aurrera egindakoak hurrengo astegunean prozesatuko dira. Behin paketea eskatutako produktu guztiekin prestatuta, hozkailua duen ibilgailu batean garraiatzen dira eskarian azaldutako helbidera. Entregak Bilbon (astelehenetik barikura) eta Basaurin (eguaztenetan) izango dira. Zerbitzu hau etorkizun hurbilean eskualdeko beste udalerri batzuetara zabaltzeko asmoa dago. Bidalketa gastuak 5,50 euro dira.
 

Bezeroek online ordain dezakete, banku bidezko transferentziaren bidez, 3D Secure segurtasun-sistema duen kreditu-txartelaz, edo paketea jasotzean.

Bezeroentzako arreta-zerbitzurako telefono bat egongo da; hau da, zalantzak argitzeko edo erosketa egiten laguntzeko. Telefonoa hauxe da: 946 023 791.
Etorkizunean erosketak online egiteko aukera Bilboko Udal Merkatuetan egoteko esperientzia eta funtzionaltasunak jasotzea da ekimen honen hasierako xedea.